A Asociación de Profesionais do Turismo da Costa da Morte (APTCM ) pon en marcha unha rede de gastronomía quilómetro cero en parte do territorio do GALP Costa Sostible (Carnota, Dumbría, Cee, Corcubión e Fisterra). Esta actuación finánciase con fondos do propio GALP.
O proxecto, denominado Temporada de Mar, consiste na creación e posta en marcha dunha Rede de establecementos turísticos que promovan e ofrezan menús baseados en produtos locais, co protagonismo especial de peixes e mariscos, combinada coa oferta de actividades complementarias relacionadas co ocio, as actividades de aventura, o comercio ou a artesanía, durante os meses con R, inicialmente dos anos 2024 e 2025.
Os meses con R, os mellores para degustar a meirande parte de especies de marisco e algunhas tamén de peixe , coinciden coa época de menor afluencia de turistas e visitantes á Costa da Morte.
Este proxecto pretende ser un dinamizador que contribúa á desestacionalización do destino á vez que promove a economía local, mellorando o nivel de actividade da restauración e por extensión o dos provedores e do sector do turismo en xeral.
• Valores do proxecto •
A pesca artesanal, modelo de comercio xusto
Calidade e frescura
- Produto exclusivo
- Coñecemento de orixe
= Transparencia
Sustentabilidade ambiental
- Baixo impacto sobre o ecosistema
- Artes de pesca selectivas.
- Non sobreexplotación
- Distribución equitativa dos recursos
Sustentabilidade socioeconómica e cultural
- Creación de emprego nas comunidades locais
- Arraigamento da poboación ao territorio
- Dinamización socioeconómica das comunidades pesqueiras
- Conservación do coñecemento e substitución xeracional
Mercado sostible
- Existe un mercado sensible ao produto extraído do mar con técnicas de pesca respectuosas e selectivas
- Canles exclusivas de venda de produtos procedentes de sistemas de Pesca Artesanal
Etiquetaxe
Para comprar peixe e marisco fresco é necesario comprobar a etiqueta que debe reflectir:
- A denominación comercial da especie. É dicir, o seu nome tal e como se coñece habitualmente.
- O nome científico, que é moi importante para saber que non nos dan gato por lebre.
- A zona de captura. Pode indicar un número estraño, que corresponde á zona FAO. Canto máis preto sexa, maiores serán as probabilidades de ser pescado de forma sostible.
A zona FAO 27 corresponde ao Atlántico Norte; a zona FAO 34, ao Atlántico centro-oriental (Canarias), e a zona FAO 37, ao Mediterráneo. En caso de dúbida o mellor é preguntar na peixaría. Ademais cada unha destas zonas conta cunha subcategoría que indica a zona de captura, polo que poderás coñecer, por exemplo, en que zona do Atlántico se capturou.
- Método de produción. Indicará se é pesca extractiva (é dicir, capturada), marisqueo ou acuicultura.*
- Arte de pesca. Coñecer a arte de pesca é fundamental porque así se poden evitar técnicas como a do arrastre, que destrúen os hábitats e son pouco selectivas.
• Slow food •
Peixe bó, limpo e xusto:
- É fresco
- Procede dunha pesca responsable
- Contribúe á sustentabilidade socioeconómica e ecolóxica do sector pesqueiro
- Procede de pesca artesanal
- É capturado con técnicas sostibles e respectuosas co medio mariño
- Cumpre a talla mínima legal establecida
- Contamina menos (menos distancia para o seu transporte)
- Emprega cadeas curtas de comercialización
- Non é capturado nin comercializado en épocas de reprodución
Época óptima de consumo (baseado só en criterios organolépticos sobre capturas de procedencia atlántica).
